(أرشيف المشهد)
- 12-7-2015 | 23:3
..............
للتحدث مع احد موظفينا ، اطلب الرقم صفر
أنا : مساء الخير يا فندم، آسفة جدا عاﻻزعاج بس النت سئ جدا عندى بقاله أكتر من شهر
الموظف : أهلا وسهلا يا فندم نتشرف بحضرتك
............
فعلا , واضح عندى ان فيه مشكلة عند حضرتك بنعتذر جدا ، حنراقب الموقف ولو ما اتصلحتش من عندنا ، حنبعت لحضرتك مندوب لحد البيت ، شكرا لاتصالك بخدمة العملاء
انا : ميرسى جدا لحضرتك كلك ذوق
· بعد حوالى اسبوع
جرس البيت يدق
صباح الخير يا فندم احنا مندوبين من شركة .... جايين نشوف العطل منين ممكن نشوف سلك التليفون طالع منين؟
أنا : أهلا وسهلا اتفضلوا.
......................
· بعد ساعات من خروجهم
للتحدث مع احد موظفينا اطلب الرقم صفر
أنا : ألو ، مساء الخير يا فندم، أحب اشكركم ﻻهتمامكم بالشكوى المقدمة منى بس للأسف المندوبين جم قطعوا عنى خدمة النت تماما ومعاها كمان خدمة التليفون اﻻرضى.
الموظف: اهلا وسهلا يا فندم نتشرف بحضرتك؟
...............
احنا بنعتذر لحضرتك جدا يا فندم ، واكيد حضرتك مستاءة من اللى حصل ، واى حد مكان حضرتك اكيد كان حيبقى مستاء جدا ، حنصعد الشكوى حاﻻ ونرد عليكى خلال 24 ساعة.
انا : العفو ، مش مستاءة وﻻ حاجة، شكرا لذوقك
· بعد مرور 48 ساعة:
للتحدث مع احد موظفينا اطلب الرقم صفر
انا : مساء الخير
الموظف : اهلا وسهلا يا فندم نتشرف بحضرتك؟
انا : لو سمحتم ، المندوبين عندكمقطعوا الخط اﻻرضى والنت وانا اتصلت وماحدش جه والخط الأرضى ما زال عطلان
الموظف : احنا بنقدر استياء حضرتك يا فندم واى حد مكان حضرتك اكيد حيبقى مستاء جدا ، انا حاصعد الشكوى بتاعة حضرتك وبكرة ان شاء الله ارد عليكى
· بعد مرور يومين:
للتحدث مع احد موظفينا اطلب رقم صفر
انا : ممكن حد يتنيل ويجى من عندكم عشان يرجعلى الخط اﻻرضى؟
الموظف مساء الخير يا فندم ، فيه شكوى من النت؟
انا : اهو مساء والسلام ،نت ايه يابنى !! انا نسيت الرفاهية دى ، انا باطالب بأبسط حقوقى , عايزاكم تصلحوا الخط اﻻرضى زى ما بوظتوه ، وابقى عيلة لو اشتكيت لكم من حاجة تانى
الموظف : طب ممكن اتشرف باﻻسم
انا : وانا مش عايزة حد يتشرف بيا ، رقمى ظاهر عندك وانت عارف الشكوى كويس.
الموظف : احنا مقدرين استياء حضرتك يا مدام واى حد مكان حضرتك اكيد كان حيبقى مستاء زيك تماما وتأكدى ان احنا حنصعد الشكوى بتاعة حضرتك ونرد عليكى خلال ساعات مش اكتر
· بعد يوم:
للتحدث مع احد موظفينا اطلب رقم صفر
انا : يا باردين يا شركة جربانة ، تصدقوا انا استاهل ضرب البلغة انى اشتكيت ، شيطان مين ابن ستين ..... اللى وزنى عشان اكلمكوا ، خلاص مش عايزة النت ، تعالوا رجعوا الحرارة اللى قطعتوها ، كانت ساعة ما يعلم بيها اﻻ ربنا ساعة ما كلمتكوا
الموظف : طب اتشرف باﻻسم
انا : والله العظيم ما انا قايلة
الموظف : طب شكوى حضرتك بخصوص ايه؟
انا : انت عارف كويس بخصوص ايه والحرارة لو ما رجعتش حاجى اعملكم فضيحة فى الشركة واخلى اللى ما يشترى يتفرج عليكم ، جتكم اﻻرف
الموظف : احنا مقدرين استياء حضرتك يا فندم، واكيد اى حد مكانك....
انا مقاطعة : حيبقى مستاء ، وفر استياءك لنفسك، عشان انا حاجى و اوريكم اﻻستياء على حق
.........
وطبعا ماحدش عبرنى و لأنى شخصية قوية وجبارة نزلت على مفيش وبعد حوالى شهر نسيت الموضوع نهائيا و تأقلمت على الموبايل مكالمات ونت.
المهم نزلت منذ حوالى اسبوع لأشترى مراتب من شركة معروفة ، وبعد ان اخترت ثلاث مراتب ، جلست مع المحاسب
المحاسب : فيه مرتبتين موجودين حاليا لكن التالتة لسة مش فى خط اﻻنتاج ، حتدخل الخط اﻻسبوع الجاى وممكن تستلميها يوم 30-7
انا : طب واﻻتنين التانيين؟
المحاسب : ﻻ دول موجودين وممكن نبعتهملك على يوم الخميس
انا : طب اوكى
الموظف : توصيل المرتبة الواحدة ستين جنيه
انا : طب ما اﻻتنين حييجوا فى يوم واحد فى نفس العربية
الموظف : هو دا النظام يا فندم واحدة زى عشرة ، يعنى لو حضرتك طالبة 10 حتدفعى 600 جنيه (اه والله العظيم)
انا : اوك ، مفيش مشكلة
الموظف : عنوان حضرتك لو سمحتى
انا : المعادى ، شارع ..... ، رقم ..... ، الدور الخامس
الموظف : معلش ، احنا بنوصل لحد الدور الرابع بس
انا : يعنى ايه ، حيرمولى المراتب فى الدور الرابع ويمشوا ؟
الموظف : هو دا النظام
انا : امرى لله ابقى اخلى عم حسن يطلعهم ، بس ابوس ايديكم خلصونى ، انا اتأخرت جدا عندكم
الموظف : احنا بنسستم البيانات يا فندم
انا : طب امضيلكم على اللى عايزينه وابقى سستم براحتك
الموظف: ما ينفعش
.....................
اخيرا انتهيت من التوقيعات المطلوبة منى وخرجت، ادرت السيارة وقطعت امتارا معدودة ، وفجأة تذكرت شيئا هاما ، حمدت الله انى تذكرته فى الوقت المناسب ، اخرجت هاتفى المحمول.
الو : شركة ..... ؟ ممكن توصلنى باﻻستاذ علاء
علاء : ايوة يا فندم
انا : انا المدام اللى كنت عندك من دقيقتين وافتكرت ان 30-7 غالبا حاكون مسافرة ، ممكن تأجلها يومين لو سمحت
علاء : ما ينفعش يا فندم ، خلاص البيانات نزلت عالكمبيوتر بمعرفة حضرتك
انا : بسيطة الف وارجعلكم ، انا تحت الشركة لسه ما اتحركتش كتير.
علاء : حتى لو طلعتى يا فندم برضه ما ينفعش
انا : انت بتهزر وﻻ بتتكلم جد؟
علاء : طبعا باتكلم جد ، دا سيستم شركة
انا : بالذمة دا كلام ناس عاقلة؟
علاء : لو سمحتى ما تغلطيش ، احنا ادينالك فرصتك كاملة ، ما افتكرتيش ليه ان وراكى سفر؟
انا : انت فاكرنى تلميذة عندك فى الكيلاس يا مستر علاء ؟ وبعدين انتو عطلتونى ساعة فى الحسابات وانا استحملتكم
علاء : هو انتى اما فرغنالك المندوب بتاعنا يفرجك عالبضاعة مش برضه ضيعتى وقته؟
انا : تصدق انى حاطلعلك بجد ، عيب اللى بتقوله ده ، هو انا اخدت المندوب منكم وعزمته على كوزين درة عالكورنيش !! دى وظيفته يا بنى ادم ، ثم انى اشتريت فى اﻻخر بكذا الف ، يعنى ما ضيعتش وقت جنابه عالفاضى
الموظف : والله ماحدش غصبك
انا : طب وربنا ﻷوريك
........................
اليوم التالى صباحا:
انا : الو ، خدمة العملاء؟
صوت واحدة واكلة ضفدع عالصبح :ايوة
انا كنت عندكو امبارح وكنت عايزة أأجل استلام بضاعة وموظف الحسابات قاللى.....
الموظفة مقاطعة : ما ينفعش
انا : يعنى ايه ما ينفعش؟ طب خليهالكو
الموظفة: براحتك ، بس حنحصل منك اتنين وعشرين جنيه عن كل يوم تأجير ارضية
انا : ارضية ايه يا ست الحاجة؟ دى لسه ما دخلتش خط اﻻنتاج اصلا
الموظفة : طب ما احنا حندخلها عشان خاطرك ، يعنى الحق علينا!!
انا : ما انا باتصل عشان أأجل دخولها خط اﻻنتاج.
الموظفة : ما ينفعش دا سيستم شركة
انا : هو انتو اللى نازل عليكو اسمه سيستم شركة! !! ، باقولك ايه يا ابلة فضيلة ادينى اللى مشغلينك
الموظفة : انا المسئولة وباقولك دا سيستم شركة والمرتبة حتيجيلك فى معادها ولو امتنعتى عن اﻻستلام حتدفعى ارضية
انا : انا باقول تطلبونى فى بيت الطاعة بالمرة.
.......................
سيبوكم من انقطاع النت ، وسيبوكم من دفع ارضية على شئ مش موجود ، وسيبوكم من الجليطة وقلة الذوق ، الأهم من كل اﻻضرار اللى لحقت بيا دى انهم علمونى طولة اللسان.
انا بجد مستاءة واى حد مكانى من المؤكد انه حيستاء ، مستاء لعنيك ، مستألك ، مستاء وانا لسه مقابلك ، بس مش قادر انطق ، اصل دا بالظبط الحاصل فى سيستم الدولة ذات نفسيها.
بالذمة حد يتبهدل كدة فى ام الدنيا! ! ، الشركتين اشهر من نار على علم وممكن تجربوا بنفسكم , ولا بلاش بدل ما تستاؤا زيى
